नेपालगञ्जः पूर्व–पश्चिम राजमार्ग अन्तर्गत बाँकेको राप्ती सोनारी गाउँपालिका–८, नयाँगाउँ नजिकै सडक किनारमा विस्फोटक पदार्थ विस्फोट हुँदा पूर्वपश्चिम राजमार्ग भत्किएको छ ।

आज बिहान नेपाली सेना सहितको सुरक्षाकर्मीको टोलीले विस्फोट भएको स्थानको अवलोकन गरेको थियो । सो टोलीले द्वन्द्वकालमा छाडिएको माइन विस्फोट भएको हुन सक्ने अनुमान गरेको थियो । प्रहरीका अनुसार विस्फोट भएको स्थानमा खिया लागेको तारको टुक्रा र चुनजस्तो धुलो फेला परेको थियो ।

सडकमा पुगेको क्षतिका कारण केही समय एकतर्फी रुपमा सवारी साधन सञ्चालन भएको सो स्थानमा अहिले विस्फोट भएको स्थानको खाडल पुरेर दुईतर्फी नै सवारी साधन सञ्चालनमा आएको प्रहरीले जनाएको छ ।

विराटचोकः आज मधेस, लुम्बिनी र सुदूर पश्चिम प्रदेशमा मेघ गर्जन र चट्याङसहित भारी वर्षाको सम्भावना रहेको जल तथा मौसम पूर्वानुमान महाशाखाले जनाएको छ ।

महाशाखाका अनुसार लुम्बिनी र सुदूर पश्चिम प्रदेशका तराईका जिल्लामा हावाहुरीको सम्भावना पनि रहेको छ ।

भारी वर्षाका कारण ती प्रदेशको जनजीवन प्रभावित हुन सक्ने हुनाले सतर्कता अपनाउन पनि महाशाखाले अनुरोध गरेको छ ।

काठमाडौंः यु–१९ राष्ट्रिय क्रिकेट प्रतियोगितामा गण्डकी प्रदेश प्रतियोगिताबाट बाहिरिने पहिलो टोली बनेको छ । लुम्बिनी प्रदेशले लगातार दोस्रो जीत हात पार्ने क्रममा गण्डकीलाई ४ विकेटले पराजित गरेको छ ।

मौसमका कारण सोमबार केही ढिलो मूलपानी क्रिकेट मैदानमा भएको खेल ४० ओभरमा घटाइएको थियो । खेलमा गण्डकीले दिएको १ सय ६२ रनको लक्ष्य लुम्बिनीले ४ बल अगावै ६ विकेट गुमाएर पूरा गरेको थियो ।

लुम्बिनीका लागि विशाल भुषालले अविजित ५२ रनको अर्धशतकीय ईनिङ खेल्दा आकाश त्रिपाठीले ४५ तथा प्रज्वल थापाले २४ रन बनाए । देव खनालले १५ रन जोड्दा सुनिल भण्डारीले १२ रन जोडे ।

गण्डकीका लागि किरण भट्टराई र सुदीप अर्यालले समान २२ विकेट लिएका थिए । त्यसअघि पहिले ब्याटिङ गरेको गण्डकीले ३६.३ ओभरमा अलआउट हुदै १ सय ६१ रन बनाएको थियो । गण्डकीका लागि सुदीप अर्यालले २० बलमा ३६ रनको योगदान गरेका थिए ।

दीपक डुम्रेले ४६ बलमा ३० रन जोड्दा करन पंगेनीले ५३ बलमा २९ रन जोडे । शिशिर भुषालले अविजित १२ तथा गोविन्द विकले १० रन बनाए । लुम्बिनीका लागि दुर्गेश गुप्ताले ५ तथा निर्मल गुरुङले ३ विकेट लिए ।

लुम्बिनी २ खेलमा १ जीत तथा १ हारका साथ २ अंक सहित अंक तालिकाको तेस्रो स्थानमा रहेको छ । चार खेलमा खेलमा अंकविहीन गण्डकी प्रतियोगिताबाट बाहिरिने पहिलो टोली बनेको छ ।